豬仔記事: 10月 2005

星期日, 10月 30, 2005

笑笑睇睇

FROM: 在十大發燒中的NetBugs

星期六, 10月 29, 2005

失望與希望

　　昨晚是自節目正式復播以來最緊張的一個晚上，我不知道我的兩名拍檔對新節目有沒有期望，然而理論上我不會在節目發聲，但最初聽拍檔談節目理念的確令我抱有很大期望。昨日節目前夕出來Meeting，Organize這個節目的拍檔印了一大疊稿以及預備了一大疊報紙，還有他精心製作的Jingle，我看得出他跟我一樣對這個節目是有期望的。可惜昨晚出來效果不如預期，甚至跟「預期」相差一大段距離。老實說，這個節目真正理念我還是作晚跟那位拍檔在Cafe談到零晨三點幾才完全了解。昨晚最失敗的不是節目失敗，而是大家既無心亦無火，拍檔那種無奈多多少少我也感受到。經過昨晚多個小時的談討，我跟拍檔們已經有新的節目部署，希望下星期第二次試播得以成功。

星期三, 10月 26, 2005

壞習慣‧怪習慣

　　真係失敗，工作太多，時間太少。始終都係keep唔到每日更新個BLOG，不過我會繼續朝住呢個方向努力。呢個POST係我死都唔做公司野前o既遺言 XDDDDD

　　唔知幾時開始，我開始唔係好想留o係屋企。一來近來工作真的多了，回家和工作幾乎劃上了等號；二來近來一個人的時候總會胡思亂想，還好近來多o左個朋友同多o左班朋友o既物體，早上工作，晚上亦不愁沒有節目。零晨十二點的時候，倘若還在旺角的話，最想的不是回家，而是上十大或者找其他節目，我的生活又踏入「頹廢週期」了。好了，兩點幾，十大也接近Close，唯有死死地氣回家，這兩個星期回家我還是開著電視漫無目的地看，看到累便會在廳的長凳訓。最終還是沒有在床訓.......現在最想做的是非必要時戒上十大，盡量嘗試唔好o係街度食飯，訓覺都係返上床訓，唔係o既話長次落去真係會死人的。

　　近期接觸多o左人，而呢班人係我生活圈子裡面從來未有過o既，我當初覺得好似個個都好悠閒，但係又唔知點解好似好有米咁，不過一講到工作或者人生大家都會有一種好濃烈o既概嘆味道。昨天我看到我一直都認為最得閒返工同唔返工都無分別o既某人，看見佢頭上的一條白頭髮我就明白，人生根本無可能會係一面倒，一面倒最多只是表面，背後的辛酸誰人知曉？種種因素令我早排的想法又在腦海浮現 - 做義工，希望幫到人之餘自己又可以看多一點(或者可以幫埋自己)。

　　上星期日同友人去了南丫島一趟，跟對上一次去南丫島相比，這次比上次的多人還要多人。兩個人呆呆的在南丫島數小時，我在沙灘眠了一會，回來後我好像沒有甚麼感覺，沒有開心亦沒有傷心，慶幸的是友人的「星期日病」沒有發作，此行總算沒有白費。

星期四, 10月 20, 2005

Work Hard. Play Hard.

　　做野做錯俾人鬧得多，近期初嘗玩都會俾人鬧o既滋味。

　　識我o既人都知去任何地方都一定會帶Pocket PC甚至帶埋部Notebook出黎，包括出去join NDS谷o既Meeting。今日就俾佢地話我打機唔專心，掛住搞部Pocket PC同Notebook。佢地都話得我岩o既，工作時應工作，反之遊戲時亦應遊戲。所以昨日出街我做了個很突破的嘗試 - 就係唔帶Pocket PC同Notebook出街。個人輕就梗係輕o左啦，你估部Notebook好輕咩？不過就無o左種安全感，touchwood假如o的Server有事，無Notebook同Pocket PC可以係好大鑊的。不過都想試下，公私不分的確唔係太好。

　　星期一晚去o左伊館睇「林海峰是但up發花癲」，我係本住「期望愈少，驚喜愈大」o既心態入去睇的。個Show好笑就肯定係好笑喇，不過唔算好好睇，如果係林公子粉絲o既話應該幾喜歡的。全場有唔少位dead air或者無乜大gag，林公子飲水位好多，我地懷疑係佢唔記得台詞扮飲水。整體黎講$180張飛入場笑下都OK，但係唔好期望好似黃子華o既棟篤笑咁睇完會有o野落袋。

PS：我o係會場買o左件林波Tee，很貴.....$180，不過我自己幾喜歡的。

星期日, 10月 16, 2005

係唔想定係怕？

　　尋日差唔多零晨五點先訓著，今日雁晝點幾先起身。一起身就去o左Join PUMB o既NDS Meeting，一如既往我都係志不在打機，只係想hea下。今日對我黎講最大o既意義係差唔多無用過Notebook或者Pocket PC，夜晚一個人去食壽司都係拎住本卡拉OK政治o黎睇，我覺得比拎住部Pocket PC舒服多了。之後七點幾上到十大竟然無電腦位，我係應該覺得「正合我意」定係「慘喇」呢？我自己都唔知自己想點，唔想對住電腦？唔係喎，依家o係十大換返電腦位仲要Remote緊屋企部機。唔想返屋企？唔知算唔算係，可能我真係當左屋企係酒店了。如果係怕返屋企，咁係怕乜呢？工作？如果係工作就唔會Remote返屋企部機做野啦。有無人可以給我一個答案？謝謝

PS：有人話我鍾意食日本o野，其實嚴格上黎講我只係喜歡食壽司。迴轉壽司是我的最愛，不過食得最多反而係百佳o既壽司，多數我會等到夜晚九點後過青衣城間百佳買$20/10件壽司(原價$4件)。百佳o既壽司其實OK的，好過好多日式料理，係衰在款式少，所以最過癮都係食迴轉壽司。最喜歡係食三文魚壽司同埋黃金尤魚壽司(唔係黃金白飯魚壽司，好多人會撈亂 ~_~)。

完了

昨晚發生了些事讓我發現了另一些事，那件事讓我很驚訝。

我剛在網吧想了一想，做了個決定，希望可以「解決」那個問題。

講完

星期四, 10月 13, 2005

誰人明白我

誰人明白我

當個BLOG寫到無野好寫，個人又Down Down地o既時候，又係發洩下o既時候。

「童夢」入面林家棟講到「人生感嘆號」，人未到中年o既我都略有感觸。我唔知我o既「人生感嘆號」
比人多還是比人少，不過在我角度而言那些「感嘆號」已經夠煩了。以下就係豬仔部份o既「感嘆號」，內容純粹發洩，唔睇無損失。

點解要成日出街食Lunch？
因為我唔想成日都困o係房到搞公司野，我想借食Lunch o既機會出去吸收下「人氣」，唔想做隱敝青年。

點解要成日出街食Dinner？
因為我唔想留o係屋企對住部電腦，一對住部電腦就係工作，工作同埋工作，我已經無睇Keroro兩個星期喇！出街食飯可以「瀾」到零晨先回家，可以唔使成日諗住工作同埋其他麻煩野。

我阿婆就唔係好明點解，不過唔明唔緊要，但係我有樣唔明想問我老豆老母好耐 - 點解要分開？分開都唔係問題，但係至少俾我知道下點解丫。

零三年那一次的事對我而言其實影響唔算好大，不過自從那次之後我真係唔想同人講太多自己o既o野，因為覺得好無保障，所以有時連我朋友甚至老媽子都未必知我諗乜。我祈禱，唔係因為我有宗教信仰，而係我想有一段儘管只有半分鐘的時間讓我冷靜一下。我o係街用Pocket PC開MSN，朋友覺得很過癮，我告訴你們，這個玩意一點也不過癮。去NDS Meeting唔係因為NDS好玩，係因為我想有班人一齊hea下。朋友說我好似做也不用做，但係有無諗過當唱緊K睇緊戲o既時候失驚無新收到SMS Alert話公司電腦出事係幾咁慘o既事？尤其是睇戲，究竟我應該裝作若無其事繼續睇完套戲定係放棄睇戲呢？寫呢個BLOG諗住愈少人知愈好，點知我發現原來就算咁少人知寫野o個陣都有野要忌諱，我覺得好無奈o羅。

發洩完，我覺得：呢個BLOG真係幾灰喎！我就還好啦，未死得。我幾年前做腦場Sales真係有諗過自殺嫁，不過自己無膽。近年就少諗o左o羅，每當我好灰o既時候一睇我個樣就知，我依家每逢好down o既時候會嘗試諗下o的開心野，做人曾經開心過呢段人生已經值得堅持同珍惜，呢個世界大把人慘過我呢。

星期一, 10月 10, 2005

至死方休...息

呢幾日真係好忙，忙到一日只係食到一餐，每日訓唔多過三個鐘。唔係工作忙就係私人事務忙，工作一忙我就唔想返屋企，因為返到屋企即係要工作，所以我已經連續個幾星期無o係屋企食過飯。上個星期幫朋友整電腦次數破晒記錄，不過都好o既，對住人地部腦仲好過對住自己部腦。亦正因為咁鬼忙所以連BLOG都無時間寫，不過我仍然希望可以keep到每日或者隔日可以寫到一篇，呢樣野都堅持唔到我諗我都無乜野可以堅持到lor......

老實講，今日係無乜野寫o既，個腦已經俾工作佔據晒，不如簡短兩句講下上星期六o既事。話說上星期同友人搭的士去佢屋企set電腦，途中同友人講開童夢奇緣有幾咁好睇幾咁感動，臨落車個司機問：講左咁耐你講緊邊套戲呀？可能係我對呢部電影特別有感觸，每次講親都會眼濕濕而且份外投入，連司機都要擰轉頭問一問。不過同司機一講到係港產片黎佢好似窒左一窒，我覺得今年港產片水準都唔差丫，唔使咁樣呀？前幾日睇完Making of 更加想入場睇多次，好多人話劉德華個妝只係一個gimmick，但係有無諗過化呢個妝劉德華要付出幾多代價？我諗睇過making of大家就會知道，明星唔係想像之中咁易做，making of 亦令我更尊重這套電影。

童夢奇緣電影官方網站

星期四, 10月 06, 2005

多謝捧場!

　　哈，真係估唔到有人會o係呢度留言，嚴格上黎講應該係話估唔到有人會睇我呢個BLOG。

　　「豬仔記事」o既前身只係諗住寫o的野俾自己睇下，發下勞騷咁。現在都係維持愈少人知有呢個BLOG就愈好o既做法，咁樣先可以暢所欲言。畢竟有時都會鬧下身邊o既人，如果佢知道有呢個BLOG我就唔會鬧鬼佢，咁就無左我寫呢個BLOG o既意義，更加唔使用「豬仔」呢個朵寫BLOG啦。不過我都好羨慕友人個BLOG可以靠Google Adsense一個月賺成二三千蚊。現在會有兩類朋友會知有呢個BLOG - 好熟同唔係好熟，睇緊o既你不妨估下你係屬於邊類型。

　　首先回覆下樓下位匿名者o既comment先，童夢奇緣真係好好睇呀，電影裡頭好多地方都值得大家思考，今年到目前為止港產片No.1肯定係呢套，如果可以o既話我都想睇多次。至於我同我老豆絕對唔存在甚麼「仇口」，而係同佢真係無乜「感覺」，有時約佢出黎食飯都唔知講乜好。但係睇完「童夢奇緣」之後，令我覺得我對我老豆未免忽略得有點過火，所以我前晚睇完「童夢奇緣」就主動打俾佢約佢出黎食飯，誰不知佢昨日無覆過我電話，真係無奈。

星期二, 10月 04, 2005

Double Downtime

　　今日諗住個人悶悶地One man band走左去奧海城睇套本身係想去睇o既電影 - 童夢奇緣。本來諗住睇下黃日華演技，點知原來成套電影咁好睇同感人。電影由開頭到個尾都好好睇，有笑亦有淚。果兩個細佬做得好好，其中有個係o係無記電視劇奪命真夫做蘇玉華個仔，果陣已經好多人話佢演得好。黃日華做劉華老豆好有新鮮感，至少唔使睇黎睇去都係果o的人做。電影開頭很有Tim Burton的感覺，不過故事並不是如外界所講似Tim Burton作品Big Fish。其實呢套電影個尾好容易會爛，不過導演陳德森真係handle得幾好，令電影可以有完美o既句號。林家棟其實可以做得再好o的，大家留意下佢o的對白就會發現其實佢係扮緊某個人 :p

去到尾果段我係咁標眼水，真係好感人。「人生的可悲係唔能夠返轉頭，人生的可喜亦都係唔能夠返轉頭。」，可能我同老豆關係疏遠，所以會睇到唔止眼濕濕，o的眼淚係一滴一滴咁流，好耐未試過咁感動喇。完場果陣我係唔想即刻走，因為我仲流緊馬尿，之後走到落food court坐低都仲要拎張紙巾抹眼淚。依家再諗，真係不如聽日打個電話問我老豆幾時得閒出黎食個飯，計落今年我只係見過佢兩次，第一次係食飯，第二次係o係家事法庭，加埋見佢唔超過三個鐘，就黎連佢手機號碼都唔記得係幾多號。睇完套戲真係想見下佢，我唔想日後後悔一世。

星期一, 10月 03, 2005

Downtime Sunday

昨天機未Down，人先Down，我又再一次顯露「呼風喚雨」o既實力 - 明明未出門口一滴雨都無，一落到街就即刻落雨。自己都知道個天唔係太like自己，所以早有準備帶了雨傘外出，一開.....雨傘的柄斷了，誰說「人定勝天」？

到了過馬路的時候，有個衝動不望後面有沒有車照過馬路看看會唔會俾車車死，今天真係灰爆呀！

星期六, 10月 01, 2005

這個世界可以有第二個電車男嗎？

岩岩跟友人們看電車男電影優先場。未看之前跟其他看過電視版網友的想法一樣，就是電影版一定沒有電視版那麼好看，至少電影版「愛瑪仕小姐」中谷美紀跟電視版的伊東差太遠吧？不過看畢後覺得其實各有各好，電視版的浮誇令整個劇的娛樂性豐富了，而電影版比較貼近現實，我很喜歡電影版的電車男「山田孝之」的對白。

看過電車男後當真有點概嘆，我的「愛瑪仕小姐」在哪呀？

PS：據友人所述，電車男小說不單有提及電車男認識愛瑪仕，而且還有提及跟愛瑪仕一起後的一些事，我有點心動想買那本小說看看呢！另外電影版完場Roll晒字幕之後會有一幕係電視版出現，講述電車男為救愛瑪仕跟醉漢糾纏。電影版最後是車務員制止醉漢的，而電視版就是電影版電車男「山田孝之」制止醉漢的，很搞笑。剛剛多看電視版第一集一遍，發現原來跟電影完場那個版本有些不一樣，很奇怪的說。

當電車男遇上電車男

我的第一次

何謂「忙裡偷閒」？今天我真的體會過了，就是忙到要在的士吃兩小時前在麥當勞買下的巨無霸，在的士吃午餐我還是第一次。現在將近零晨四時，N封客戶電貓未覆，但卻在寫BLOG，這不算「忙裡偷閒」那怎樣才算？

前兩天悠閒得恐怖，但昨天星期五卻忙得可憐。睡了三小時，上午九時半就開始接客電話接到傻，中午拿了ROUTER之後測試了一會又回覆了客戶電郵一會，連中午買回來的麥當勞還未吃完就要「飛的」過牛棚準備今天的直播。在的士途中，一邊吃從家中拿出來的巨無霸一邊在想：「點解要做得那麼辛苦，值得嗎？」。值得與否可能要今天過後才知道，不過可以肯定的是既然應允做這件事不單止要做，還要做到最好。

希望各位朋友今天到講台talkonly網站收聽直播或者到現場支持下。另外要留意下，其實29/9 - 3/10一連五日牛棚藝術村會舉行書展及各式各樣的座談會，有興趣的朋友可以到現場一遊，在這裡特別一提這個是因為我覺得大家未免太輕描淡寫牛棚書展這回事了。

就算失望，不能絕望

姓名： 豬仔

位置： 香港, 香港, Hong Kong

人一個，想為世界出一分力但係原來世界根本唔需要我甚至嫌我阻住個地球轉。

查看我的完整個人檔案

豬仔記事